تجربة التحول لحياة صحية أكتر - حلقة 3 ( هغير حياتى )

السلام عليكم ورحمة الله

هنكمل النهاردة ان شاء الله ..

اتكلمنا المرة اللى فاتت عن تظبيط الأكل وده مهم كده كأولوية فى تغيير الحياة للأفضل لان الأكل بيمد الجسم والعقل باللى محتاجه بالظبط لطاقة شغله والباقى يبقى عليكى وقلنا هنتكلم عن تفصيلات مهمة فى أنواع الاكل فى مواضيع لاحقة ان شاء الله بس هنتكلم فى موضوع النهاردة عن تغيير الحياة على مستوى التفكير والعصبية

نفسى ابقى سعيدة .. دى جملة عن معظمنا مش سعداء ومش عارفين ليه مش سعداء

انا عصبية  وبتنرفز بسرعة ... جملة بتتكرر كتييييييييييير

الدنيا ملخبطة معايا وعندى مشاكل مش عارفة احلها .... لسان حال البعض.. كل حاجة من دول ليها حل

المهم بقى التغيير فى طريقة التفكير بتبدأ من جواكى لسبب مهم أوى هو المشكلة فين؟ وسببها ايه؟

لو عندك مشاكل قديمة مأثرة على حياتك ومش مخلياكى سعيدة  وعايزة تنسيها . حلها ايه؟

هو الاول عايزة تنسيها ليه؟ ما فيش زر فى المخ ممكن تدوسى عليه تنسى كل اللى فات ومشاكله لكن ممكن تخلى عقلك يركنه على جنب وما يعملكيش مشاكل بمعنى ان العقل عامل زى المسجل بيسجل عليكى كل حاجة بتعمليها او غيرك يعملها ويشيلها ويخزنها وطريقة تفكيرك هى اللى بتتحكم فى الحاجات المخزنة دى يا اما يتجاهلها او يخليها كده تنغص عليكى حياتك

هقولك زى ايه ؟ زى مثلا ما تكونى فى الشغل ومديرك يلاقيكى جاية متأخرة فيكتبلك جزاء ويديكى الورقة بالخصم تقومى ماسكة الورقة ومعلقاها امامك كده فى الرايحة والجاية عشان ما تنسيش الموقف ده وتفضلى طول ما انتى رايحة وجاية مفروسة وعصبية ومتغاظة لانك بتعملى لنفسك شحنة غضب كل شوية يالطريقة اللى استخدمتيها للتعامل مع الموقف لكن لو شيلتيها واعتبرتيها مشكلة وعدت وممكن تركزى فى تنظيم وقتك بعدها عشان ما تتكررش . ولو عملتى حاجة تانية تغطى على غضبك وتفرحك هتقللى من او تلغى كمان شحنة الغضب اللى بتديها لنفسك كل شوية

مخك كمان بيعمل كده وبينفذ طريقة تفكيرك لما يلاقيكى مش عايزة تنسى ما بينسيكيش وبيفضل حاطط الملفات المؤلمة اللى مسجلها ظاهرة طول الوقت فتفضل شحنة الغضب شغالة طول الوقت منغصة عليكى حياتك

حتى لو بتقولى عايزة انساها عقلك مش بيصدقك غير لما تديله دافع قوى يخليه يركن المشاكل المؤلمة اللى فاتت على جنب وما يخليهاش تأثر على حياتك

الموضوع مش صعب خالص بس محتاج تدريب

ومحتاج انك تعلى من قدرات عقلك شوية وتشغليه بحاجات أهم من مجرد مشاكل بيفكر فيها .. اقرأى كتب فى اى مجال او اتعلمى حاجة جديدة اشغلى مخك دايما بشئ مفيد ده هيدى دافع لعقلك انه يقلل من قيمة المشاكل التانية ويهدى شوية

ده فى حالة ما كانت المشاكل دى انتهت من فترة لكن تذكرها بيفسد حياتك ومش مخليكى مبسوطة أما لو كانت مشاكل مستمرة  ف لازم تحليها

نصيحة مهمة جدا جدا اوعى تسيبى اى مشكلة معلقة مش غير حل لانها هتفضل تضغط على حياتك طول الوقت فلازم تحليها مهما كان حجم المشكلة فلازملها حل من اتنين يا اما حلها جذريا او تجاهلها تماما لو هى حاجة حلها مش فى ايدك او متاح ليكى وده قليل اوى

لكن افتكرى دايما ان مهما كانت المشاكل كبيرة فليها حل بس ممكن يكون محتاج شوية صبر على شوية تفكير وذكاء فى الحل

اقعدى من النهاردة واكتبى بالورقة والقلم كل مشاكلك اللى منغصة عليكى حياتك وبعديها المشاكل العادية وحاولى تلاقيلها حلول

هتفكرى شوية وهتاخدى وقت مش مشكلة خدى وقتك كامل ولو ما لقيتيش سيبيها شوية وارجعى للورقة فكرى فى حلها تانى

خففى من الضغوط اللى فى مخك وفضيه لحاجات تانية أهم جدا .. انتِ محتاجة تمليه افكار ايجابية عشان الحياة اقصر من اننا نضيعها فى مشاكل وهموم ومحتاجين نعيشها فى سعادة مش فى هموم

أتمنى لكم السعادة يارب

:)

تجربة التحول لحياة صحية أكتر ( هغير حياتى ح2 )

بسم الله نبدأ ان شاء الله سوا واحدة واحدة .. ركزوا معايا 

فى الأول محتاجين نفهم شوية حاجات :

اسلوب حياتنا اختلف على مر السنين ودايما بنسمع جملة " الدنيا اتقل خيرها" " فين حاجة زمان وصحة زمان" ايوة زمان كان كبار السن كإنهم شباب يقدروا يشيلوا ويحطوا ويتحركوا يعنى قارنوا كده صحة الجدود بصحة الشباب دلوقتى اللى فى سن ال 20 ما بيقدروش يطلعوا 20 درجة سلم على بعض وبينهجوا.

السبب فى كل حاجة بنعملها واختلافها عن زمان من أكل وشرب وحركة وطريقة تفكير كمان

البداية من العقل فى كل شئ تقريبا 

ربنا فضٌل الانسان بالعقل وجعله سر وجوده وتكيفه فى الدنيا 

العقل ده بقى هو اللى بيمشى كل حاجة فى حياتنا سواء بإرادتنا او بغير إرادتنا 

بغير إرادتنا يعنى بيحرك أعضاء الجسم عشان تشتغل وبإراتنا يعنى بالتفكير والتوجيه بأى فعل

يعنى لو عرفنا المعدة بتشتغل إزاى هل هيفرق فى طريقة عملها أكيد لا لكن لو عرفنا بتشتغل ازاى هيفرق فى صحتنا احنا وفى صيانتها بمعنى ان النيل مثلا بينضف نفسه كل كام كيلو من اى تلوث فيه لانه ماء جارى لكن فى السنين الاخيرة زاد التلوث على النيل فما بقاش قادر ينضف نفسه لان كمية الملوثات اللى فيه اكبر بكتير وما بيلحقش فنفس النظام لكل حاجة ومنها أعضاء الجسم اللى هى أجهزة بتشتغل ولازملها صيانة دورية وطبعا فيها صيانة ربانية وكمان ربنا بيقولنا ناخد بالاسباب ولازم ناخد بالنا من صحتنا ونحافظ عليها

إذن البداية بالعقل والعقل زى الجسم بالضبط بيتغذى من الغذاء اللى بناكله وبياخد منه احتياجاته زى الجسم بالضبط وعلى حسب الاكل اللى بناكله يا اما صحى او لا بيتكون العقل والجسم وجهاز المناعة بتاعه

الاكل الصحى أحد أهم أسباب الصحة العقلية والجسدية لازم نهتم بنوع الاكل اللى بناكله وبعد ما ياكل وبتشحن طاقة نظيفة يبدأ يتحرك ويحركنا معاه وهنا يبدأ دور التفكير وطريقته والمشاكل وطريقة معالجتها ولو كان فيه مشاكل هيكون بمثابة العراقيل اللى بتستهلك العقل وطاقته وهيحتاج طاقة وجهود اكبر 

كل حاجة بتأثر علينا يعنى العقل بيأثر على الجسم والجسم بيأثر على العقل 

يعنى لو تعبانين ومرهقين جسمانيا هل ممكن نركز بنفس القدر اللى ممكن نعمله لو كنا بكامل طاقتنا ؟ الاجابة لا لان العقل والجسم مكملين لبعض و زى ما ربنا قالنا على لسان نبيه : عن النبي صلى الله عليه وسلم أنه قال:

(( مَثَلُ المؤمنين في تَوَادِّهم وتراحُمهم وتعاطُفهم: مثلُ الجسد، إِذا اشتكى منه عضو: تَدَاعَى له سائرُ الجسد بالسَّهَرِ والحُمِّى 

[أخرجه البخاري ومسلم عن النعمان بن بشير]

من الحاجات اللى كلنا عارفينها فى الطعام الصحى انه يكون طازج ويجب الاكثار من الفواكه والخضروات والتقليل من المحمرات والمقليات و دى معلومة عارفينها كلنا لكن هل بننفذها ؟؟؟؟

محتاجين نفعل هذه المعلومة وننفذها واحدة واحدة ونقول لبعض عملنا ايه والنتيجة 

هتعرفوا ايه تأثير الاكل بالضبط و أد ايه بيأثر فعلا فى الدماغ والحياة والمود النفسى فى المواضيع التالية ان شاء الله

قولولى انطباعاتكم واقتراحاتكم واسئلتكم عشان نتابع سوا 

تجربة التحول لحياة صحية أكتر ( هغير حياتى ح1 )

رجل وإمراة فى سن السبعين مصريين و رجل و إمرأة فى سن السبعين أجانب 

ما الفرق بينهما ؟

- الرجل المصرى مش قادر يشيل عجوزمريض وزنه فى حدود حاجة واربعين كيلو او اقل عشان يطلعه للدكتور يتعالج

- المرأة المصرية لا تقوى على الحركة وبيشيلوها بكرسى 

-  4x 4الرجل الأجنبى كان تمرينه كل يوم الصبح انه يشد عربيته ال 

مسافة معينة ويجرى كل يوم ويطلع الجبل 

- المرأة الأجنبية كانت بتمشى وتتحرك بسهولة جدا وتقريرها الطبى خال من أى أمراض

الاشخاص دول حقيقيين على فكرة مش من تخيلى والقصتين من اسبوع

نفهم من كده إيه؟

صحيح ان المرض بإيد ربنا وحده يصيبنا أينما كنا ومهما فعلنا ولكن ربنا مديلنا اختيارات واحنا اللى بنضيعها 

بعد ما قارنت أسلوب حياتهم ... أنا عن نفسى أفهم من كده إن نمط الحياة وطريقتها هى اللى بتعمل ده .. والأهم انك ما تبررش لنفسك استمرارك فيها عشان تريح ضميرك أو الاستسلام 

أنا قررت أغير نمط حياتى وطريقتى فى الحياة بشكل صحى أكتر بقدر المستطاع .. مين يحب يشاركنى المحاولة ... انا هابدأ ان شاء الله بس لو كنا مجموعة هتبقى أحلى