للخمسينات .. للضحكة اللى كانت طالعة جديد.. دى كانت مقدمة برنامج ساعة لقلبك التلفزيونى بصوت شويكار
وأنا بسمعها تخيلت نفسى فى الزمن ده وتخيلت شكله من خلال الافلام والروايات عن هذا الزمن وما أتوقعه عنه
فى الخمسينات كانت المرأة مكانها البيت وبس لا شغلة ولا مشغلة غير البيت ومسؤولياته والرجل ما بين شغله ولقاء أصدقائه
الحوار ده من الخمسينات: بين 2 وأزواجهم فى الزمن ده ولنفترض مثلا أنهم من
الطيقة المتوسطة يعنى لا ارستقراطية ولا فقيرة مضمحلة ( حلوة مضمحلة دى )
عنايات: إيه رأيك يا شفيقة هانم نروح نحضر حفلة الست الأسبوع الجاى بيقولوا
هاتقدم أغنية جديدة وأهو فرصة نخرج نشم هوا
شفيقة : مش عارفة ياعنايات هانم هاسأل عمر أفندى جوزى . بس ما احنا ممكن نسمعها فى الراديو . انت عارفة الأفندى بتاعى جاب لنا راديو من كام شهر وأصحابنا وجيراننا عندنا كل حفلة بنتجمع ونسمعها سوا
عنايات : طيب هاشوف كده . بس عندى غسيل فُتك بعافية
شفيقة : الله يعافيكى
عمر أفندى : (رجع البيت ): مساء الخير ياهانم
شفيقة: مساء النور ياعمر أفندى . أحضرلك العشاء
عمر أفندى: اه إذا تكرمتى ياهانم
..................................................................
وإلى هنا تنتهى حقبة الخمسينات ونطير على السبعينات
عنايات بقت نونى وشفيقة بقت شوشو
نونى : هاى يادارلنج اخبارك ايه ؟
شوشو: تمام . حاتروحى الرحلة بتاعة الجامعة
نونى: طبعاااااااااا وانا من امتى بفوت رحلة . .قولى لكل الشلة هاتبقى رحلة تحفة يالاااااااااااااا
.........................................................
الثمانينات والتسعينات
الناس مطحونة مش فاضية تفكر فى أى حاجة
.................................
الألفينات:
عنايات بقت عونى وشفيقة بقت شفشق و عمر بقى رونى
عونى: ازيك ياتوتة واااااااااااااو. ايه كفر الفيس بوك الجامد ده جبتيه منين عايزة اغيره انا كمان ناو
شفشق: لااااا. تدفعى كام واقولك . ده انا عاملاه مخصوص عشان اغيظ بيه حد معين
رونى: هاى عليكم
عونى : ازيك يا مان فينك من زمان
رونى: كنت محبوس فى اوضتى بنزل اخر نسخة من برنامج المسابقات على الموبايل وكان بيهنج والشبكة واقعة وحاجة يع
شفشق: احسن . يالا اتكلوا على الله .يالا من هنا كله يروح على بيته وشوفوا لكم موقف تانى تقفوا فيه
رونى : بتطرودينا يا شفشق ده احنا حتى فى كافيه محترم
شفشق : طيب يالا عشان هنرش ميه. امشوا بقى
.....................................................................
وإلى هنا ننتهى من رصد التطور اللغوى فى لغة التعبير والتواصل بين الناس
تطورنا من يا فلان بيه و فلانة هانم
ل يالا بقى عشان هنرش ميه يا مان ناووووووو
ولا أعرف إذا كان هذا حقا عربى أم عربى على انجليزى مكسر أم عربى مكسر على انجليزى مدشدش
لغة الحوار من الراقى إلى المنحدر أو ما يسموها لغة العصر
فهل لغة العصر معناها البلطجة الكلامية أم معناها مسايرة التكنولوجيا
تطور عنايات لنونى لعونى
وتطور عمر ل رونى
لا تعرف المتحدث رجل أم امرأة . تشابه فى الملبس وفى قَصة الشعر وطريقة الكلام
....
اللغة هى ما تظهر حضارة أى شعب ومدى تقدمه وإذا لم نعتنى بها فسوف نتدهور أكثر من ذلك
قارنوا فقط بين لغة التعبير والتواصل بين الاشخاص فى بلد مثل اليابان وبين اى بلد من بلاد العرب
اللغة مقياس للتقدم والإنحدار وليست بالشئ الهين الذى لا يُعتد به
اللغة المستخدمة فى الحوار بين الأفراد هى أول ما يدل عليك ويحدد شخصيتك للمستمع
فلنرتقى بلغتنا فلنرتقى بأخلاقنا
دمتم راقيين
بقلم أمل حسن
No comments:
Post a Comment