مشاكل الزواج

قرأت كذا بوست النهاردة بخصوص موضوع كنت عايزة اتكلم فيه من فترة وشكل ده وقته بقى.

المهم ان بحكم شغلى وبالصدفة البحتة كان امامى فى الفترة اللى فاتت عدد كبير من المشاكل فى اتجاه واحد ألا وهو مشاكل الازواج والزوجات ومشاكل الأهل اللى بيضغطوا على الابن أوالابنة للزواج قبل سن معين عشان يلحق يكون عنده او عندها اطفال أو لما يكبر يلاقى حد جنبه وهكذا

كلام بيتقال وبيتسمع اكتر من مرة فى اليوم الواحد . متناسين ان فيه قدر و رزق  مكتوب ... والاولاد رزق فى الغيب غير معلوم . صعب تبنى حياة لسبب مش فى ايدك تأكيده او نفيه ....  ببساطة الضغوط اللى من النوع ده او غيرها سببت الكثير من المشاكل بعد كده ... لان فجأة بيلاقوا نفسهم زوجين لكن مش فاهمين بعض .. فى بيت واحد لكن ما بيتكلموش مع بعض .. خناق احيانا بيكون من أول يوم زواج وأحيانا ضرب من الزوج للزوجة ... وأحيانا إهانة زوجة لزوج ..أو نكد كل يوم على اتفه سبب .. وخناق على اسباب مش موجودة اصلا .....الخ...... ومشاكل لا حصر لها وبغض النظر عن المشاكل الحياتية العادية فى كل بيت ... كان النصيب الاكبر من المشاكل للازواج اللى كانوا مجبرين يتزوجوا من ضغط الاسرة عليهم بسبب السن او تقدم العمر كسبب أولى وفيه أسباب تانية كتير بس ده اكتر الاسباب انتشارا خاصة فى العالم العربى . اللى فيه الناس بتتزوج وفقا لتقاليد معينة أو عرف معين والعائلات الكبيرة لازم تتزوج من بعضها ورأس المال يتزوج رأس المال وكإنها صفقة مش مشكلة يعنى . أو عائلة لها اسم وعريقة ولازم هذا الاسم العريق يمتزج باسم أعرق منه عشان يكمل تسلسل العائلة وهكذا من مشاكل المعدمين فى الزواج لمشاكل الاثرياء , كلها نفس الخطأ الذى يتكرر ونفس السيناريو الذى لا ينتهى ألا وهو الضغط على الابناء والزج بهم فى تكوين أسرة لا يردونها ولا التقاليد والاعراف والمال والجاه , ياله من سبب وجيه من وجهة نظرهم لاجبار اثنين على تزويد حساباتهم البنكية من خلال عقد قران ينتهى بطلاق او متاهة

هذه الزيجات كثير منها انتهى بالطلاق وبعضها لمزيد من الخلافات

النتيجة من هذا الكلام ليس الاحباط وانما للتنبيه

على فكرة مش كل الزيجات كده بالتأكيد فيه زيجات ناجحة جدا وأزواج سعداء جدا ربنا يديمها عليهم ...

الخلاصة : كل شخص يتزوج لما يلاقى الشخص المناسب اللى يكون عارف ان هو ده اللى نفسه يكمل باقى حياته معاه لان ببساطة الزواج مش هينفع فيه جملة

" نجرب ونشوف" ... ببساطة خد القرار المناسب وحلو لو يكون فى الوقت المناسب بس الشخص المناسب أهم بكثير

فكر أو فكرى أكتر من مرة قبل القرار عشان يكون اقرب للصواب. هيه مش صفقة ولا تجربة ولا لعبة يعنى لازم كل شئ يكون مدروس ومحسوب وايضا هى مش دراسة جدوى اقتصادية لكن على الاقل يكون فيه قبول شخصى وفكرى وتقبل العيوب قبل المزايا والرغبة الصادقة فى انشاء أسرة سعيدة

افتكروا دايما ان الحياة اختيارات واحنا اللى بنختار فاحرصوا على انه يكون اختيار جميل

فى النهاية احرصوا برده على رضا الوالدين وخلوا كل القرارات بالحسنى

مطلوب نشوف الوحش عشان ما نكرروش ومطلوب نشوف الحلو عشان نعرف ان فيه دايما حياة أحلى ممكن نعملها لو عايزين

دمتم سعدااااااااااااااااء دايما

.......................

امل حسن