تجربة التحول لحياة صحية أكتر - حلقة 3 ( هغير حياتى )

السلام عليكم ورحمة الله

هنكمل النهاردة ان شاء الله ..

اتكلمنا المرة اللى فاتت عن تظبيط الأكل وده مهم كده كأولوية فى تغيير الحياة للأفضل لان الأكل بيمد الجسم والعقل باللى محتاجه بالظبط لطاقة شغله والباقى يبقى عليكى وقلنا هنتكلم عن تفصيلات مهمة فى أنواع الاكل فى مواضيع لاحقة ان شاء الله بس هنتكلم فى موضوع النهاردة عن تغيير الحياة على مستوى التفكير والعصبية

نفسى ابقى سعيدة .. دى جملة عن معظمنا مش سعداء ومش عارفين ليه مش سعداء

انا عصبية  وبتنرفز بسرعة ... جملة بتتكرر كتييييييييييير

الدنيا ملخبطة معايا وعندى مشاكل مش عارفة احلها .... لسان حال البعض.. كل حاجة من دول ليها حل

المهم بقى التغيير فى طريقة التفكير بتبدأ من جواكى لسبب مهم أوى هو المشكلة فين؟ وسببها ايه؟

لو عندك مشاكل قديمة مأثرة على حياتك ومش مخلياكى سعيدة  وعايزة تنسيها . حلها ايه؟

هو الاول عايزة تنسيها ليه؟ ما فيش زر فى المخ ممكن تدوسى عليه تنسى كل اللى فات ومشاكله لكن ممكن تخلى عقلك يركنه على جنب وما يعملكيش مشاكل بمعنى ان العقل عامل زى المسجل بيسجل عليكى كل حاجة بتعمليها او غيرك يعملها ويشيلها ويخزنها وطريقة تفكيرك هى اللى بتتحكم فى الحاجات المخزنة دى يا اما يتجاهلها او يخليها كده تنغص عليكى حياتك

هقولك زى ايه ؟ زى مثلا ما تكونى فى الشغل ومديرك يلاقيكى جاية متأخرة فيكتبلك جزاء ويديكى الورقة بالخصم تقومى ماسكة الورقة ومعلقاها امامك كده فى الرايحة والجاية عشان ما تنسيش الموقف ده وتفضلى طول ما انتى رايحة وجاية مفروسة وعصبية ومتغاظة لانك بتعملى لنفسك شحنة غضب كل شوية يالطريقة اللى استخدمتيها للتعامل مع الموقف لكن لو شيلتيها واعتبرتيها مشكلة وعدت وممكن تركزى فى تنظيم وقتك بعدها عشان ما تتكررش . ولو عملتى حاجة تانية تغطى على غضبك وتفرحك هتقللى من او تلغى كمان شحنة الغضب اللى بتديها لنفسك كل شوية

مخك كمان بيعمل كده وبينفذ طريقة تفكيرك لما يلاقيكى مش عايزة تنسى ما بينسيكيش وبيفضل حاطط الملفات المؤلمة اللى مسجلها ظاهرة طول الوقت فتفضل شحنة الغضب شغالة طول الوقت منغصة عليكى حياتك

حتى لو بتقولى عايزة انساها عقلك مش بيصدقك غير لما تديله دافع قوى يخليه يركن المشاكل المؤلمة اللى فاتت على جنب وما يخليهاش تأثر على حياتك

الموضوع مش صعب خالص بس محتاج تدريب

ومحتاج انك تعلى من قدرات عقلك شوية وتشغليه بحاجات أهم من مجرد مشاكل بيفكر فيها .. اقرأى كتب فى اى مجال او اتعلمى حاجة جديدة اشغلى مخك دايما بشئ مفيد ده هيدى دافع لعقلك انه يقلل من قيمة المشاكل التانية ويهدى شوية

ده فى حالة ما كانت المشاكل دى انتهت من فترة لكن تذكرها بيفسد حياتك ومش مخليكى مبسوطة أما لو كانت مشاكل مستمرة  ف لازم تحليها

نصيحة مهمة جدا جدا اوعى تسيبى اى مشكلة معلقة مش غير حل لانها هتفضل تضغط على حياتك طول الوقت فلازم تحليها مهما كان حجم المشكلة فلازملها حل من اتنين يا اما حلها جذريا او تجاهلها تماما لو هى حاجة حلها مش فى ايدك او متاح ليكى وده قليل اوى

لكن افتكرى دايما ان مهما كانت المشاكل كبيرة فليها حل بس ممكن يكون محتاج شوية صبر على شوية تفكير وذكاء فى الحل

اقعدى من النهاردة واكتبى بالورقة والقلم كل مشاكلك اللى منغصة عليكى حياتك وبعديها المشاكل العادية وحاولى تلاقيلها حلول

هتفكرى شوية وهتاخدى وقت مش مشكلة خدى وقتك كامل ولو ما لقيتيش سيبيها شوية وارجعى للورقة فكرى فى حلها تانى

خففى من الضغوط اللى فى مخك وفضيه لحاجات تانية أهم جدا .. انتِ محتاجة تمليه افكار ايجابية عشان الحياة اقصر من اننا نضيعها فى مشاكل وهموم ومحتاجين نعيشها فى سعادة مش فى هموم

أتمنى لكم السعادة يارب

:)